كل ما فاضت عيوني نجر ابـن حربـان دنّـا=في ضلوعي يسمع اللي مـن ورا بغـداد دنّـه
يوم ابن مدعث لنا سـنّ الوجـود الحـقّ سنّـا=وا فوادي كنّ دود الارض يرعـى فـي مسنّـه
وا فوادي لو تضنّى يابن مدعـث مـا تضنّـى=كنّّـه المجـدور عقـب الجـور مرمـيٍٍّ بعنّـه
اشعل التنبـاك مـن خلقتـه مـا شبّـه و كنّـا=مير كنّّه من عجاج فـاح مـن صـدره يكنّّـه
وا وجودي وجد منهـو عـضّ بابهامـه وحنّّـا=واحدٍٍ شـاف الثـلاث البيـض سـودٍ مستجنّـه
شـاف قـدّام الخيـام خشيـف ريـمٍ مرجهنّـا=وثوّر البندق يبي صيـده وراغ الخشـف عنّـه
اطلق اربع عقبها اربع ثم سمـع صـوتٍ يونّـا=واثرها امّه صابها طلقه و طـار العقـل منّـه
واتهمـوه بذبحـة امّـه ليلـة العيـد و تجنّـا=اتهمتـه النـاس و صـدوف المقاديـر اتهمنّـه
قالوا اخوانه ترى منّـا بمنـك ولا انـت منّـا=يفرق الله بيننا و بينـك عسـى مالـك مظنّـه
لك ثلاث ايام من ذلحين و ارحـل مـن وطنّـا=عقبها تخطر على راسـك مضاريـب الاسنّـه
ودّع مريته وتـوْ بنتـه صغيـره مـا تحنّـى=توّها ام اربع شهـور و فـي لحَمهـا زود لنّـه
ركْب غوجه و انقلـب قبلـه بليـلٍ مـا تونّـى=والحمايا مـن خلافـه ارخـوا حْبـال الاعنّـه
المطايـا و السبايـا مـن خـلافـه عمـدنّـا=والمنايـا سـجّـدٍ قــدّام عيـنـه يحتـرنّـه
كل ما عنّز علـى قـومٍ وطـنّ الـراس طنّـا=قالوا اذلـف ذابـح امّـه لعنبونـا لـو نحنّـه
ذابـح امّـه لـو زبنّـا عـدّه انّـه مـا زبنّـا=لعنبـوك بْيـوت قـومٍ ذابـح امّــه زبنـنّـه
الجمالـة مـا تجمّـل فـي ولـد حـرٍّ تدنّـى=ميـر دوّرغيرنـا وانحـش بقلبـك لا نـدنّـه
وانقلب من عندهـم كنّـه علـى محمـاس بنّـا=يمّة اهل الغـوص عجـلات الركايـب وجّهنّـه
ركْب بابـور البحـر و دمـوع عينـه يذرفنّـا=فـوق خـدّه كنّـهـنّ اذواد بــدوٍ مرثعـنّـه
يـوم حـلّ الليـل اشرعـة السفينـه دودلنّـا=و الهبايـب مـا يخلّـنْ محبـلٍ مـا دودلـنّـه
قام ربّـان السفينـه قـال يـا نـاس امتحنّـا=قوموا ادعوا ربّكم عـلاّم مـا وسـط الاجنّـه
قال شيـخٍ منهـم الا عنـدي الـراي المطنّـا=ضحّوا بواحد عسـى الله ينقـذ ايديـنٍ رجنّـه
و طاحت القرعه على اللي ذابح امّه مـا تتنّـى=ثم رموا به فـي ظلمـات البحـور المستكنّـه
و ادبحوا عنّه وهو فـي غبّـة المـوج يتثنّـى=ثم عرض له من وحوش القرش جرجورٍ و صنّه
عضّ جرجور البحر ساقه و صايح و استجنّـا=ابك لولا الله كـلاه القـرش مـا يسلـم مطنّـه
وفي ديارٍ من بلاد الهنـد بيـن انـسٍ و جنّـا=من فضل ربي عليه اطراف الامـواج احذفنّـه
ومثل ما قبل امس متهـومٍ بذبـح امّـه معنّـى=اتهمـوه بذبـح سلطـان الـبـلاد المطمئـنّـه
و في السجون المظلمه خمسة عشر عامٍ قضنّـا=مع ثلاث مـا قضـنّ الا عقـب حالـه قضنّـه
لا سمع ورقاً تغنّـي جـرّ مسحوبـه و غنّـى=وكلّ مغنىً يزعجه غصـبٍ يجـي تاليـه ونّـه
ولا طرته بْيـوت قـومٍ فـي الخلايـا يرفعنّـا=دار دولاب الدبـا الدالـوب دولابـه و زنّــه
وكل ما برقٍ سرى شرقٍ صدوق الغيـث شنّـا=كن قلبـه فـوق سبـق طيـور بـرٍّ شطرنّـه
عقـب مـدّه جـاه مـن داره نذيـرٍ مرثعنّـا=قـال انـا جيتـك بعلـمٍ والله انّـه والله انّــه
حرمتك ماتت لها عشـر سنـواتٍ قـد مضنّـا=و البنيّـه معمـسٍ تقـرع عليـك قـراع شنّـه
عمّها عزّر بها فـي وسـط بيتـه مـا تهنّـى=خادمـة نسوانـه الثنتيـن و اللـي ضيفـنّـه
ثم زوّجهـا لبـو سبعيـن عـامٍ مـا انقصنّـا=شايبٍ يطرب خفوقـه لا سمـع للقـرش رنّـه
يوم سمْع هْروجهم فاضـت عيونـه و ازحرنّـا=وسط سجنه كنّّه اللي ساكـنٍ لـه فـي مجنّـه
قال يا ربعي افزعوا لي مـن سجـونٍ غيضنّـا=و قبر قلبي الدمـدم آغـادي يديكـم يظهرنّـه
قالوا انّـا وش لنـا انّـا والله انّـا مـا شحنّـا=غير بنتك والاّ مثلك مـا قربـه بقـرب جنّـه
وانتحـوا وعيـون قايدهـم جنـوبٍ خايلـنّـا=وهو ورا سجنـه عيونـه كـلّ نجـمٍ خايلنّـه
وعقب عامٍ من مجيْ ربعه و سنٍّ عـضّ سنّـا=اعفوا الكفّـار عنّـه مـن عقـب سـودٍ دهنّـه
يوم فكّوا قيـد رجلـه وانطلـق خاطـرْه منّـا=و انفلت يبغى ديـارٍ مـن ورا نجـد اشحننّـه
حثّ ساقـه مـا يشـوف الا بنيتـه يـوم قنّـا=من عقب عشرين عامٍ في وطـن قـومٍ مصنّـه
ومن ردى حظه نهار اغضنْ عيونـه و ارقدنّـا=فزّ من نومه عقـب عضّـه حنـش دابٍ بسنّـه
ومن اثر سم الحنش يونـس ضلوعـه يطبخنّـا=و طاح عزّي لواحـدٍ سـود الافاعـي طيحنّـه
يـوم هـو فكّـر والـى فوقـه نجـومٍ يبرقنّـا=وشاف بكيـة بنتـه اللـي جـا يبيهـا بينهنّـه
قال يا نجوم السما تكفين روحي صـوب اهلنـا=علّمي بنتي عن اللي صـاب ابوهـا واستسنّـه
اشهد انّا مـا بحلنـا فـي الليالـي اشهـد انّـا=مير حظي خانني ثمْ مات مـا بـه مـن يقنّـه
ذاك وجده وجد حالي فـي وطنّـا مـن عطنّـا=من هنوفٍ خدرهـا بيـض الهنـادي يحتمنّـه

قصيده جميله جداااا...

واشكركـــ على حسن الاختيار

يعطيك العافية يالمجازف على التشريف والمرور وبالغعل القصيدة جميلة ورائعة